తిరుమలనాథ స్వామి ఆలయ అభివృద్ధికి మరో ముందడుగు..
రాజగోపురాల నిర్మాణానికి ప్రతిపాదనలు సిద్ధం చేయండి
ప్రతిపాదనలు పంపితే నిధుల మంజూరుకు కృషి చేస్తా:
ఎండోమెంట్ డిప్యూటీ ఇంజనీర్ శ్రీనివాస్ శర్మ
సిద్దిపేట టైమ్స్, రామాయంపేట, అక్టోబర్ 24.
మెదక్ జిల్లా నిజాంపేట మండల పరిధిలోని చల్మెడ గ్రామంలో కొలువై భక్తుల కొంగు బంగారంగా విరాజిల్లుతున్న శ్రీ శ్రీ తిరుమలనాథ స్వామి ఆలయ అభివృద్ధికి మరో ముందడుగు పడింది. స్వయంభూగా వెలసిన ఈ పవిత్ర క్షేత్రంలో ఆలయ అభివృద్ధి పనులు వేగం పుంజుకుంటున్న నేపథ్యంలో దేవాదాయ ధర్మాదాయ శాఖ అధికారులు క్షేత్రస్థాయిలో పరిశీలన చేయడం ప్రాధాన్యత సంతరించుకుంది.
శుక్రవారం దేవాదాయ ధర్మాదాయ శాఖ ఎండోమెంట్ డిప్యూటీ ఇంజనీర్ వేమూరి శ్రీనివాస్ శర్మ తిరుమలనాథ స్వామివారిని దర్శించుకుని ప్రత్యేక పూజలు నిర్వహించారు. ఈ సందర్భంగా ఆలయ పురోహితుడు, వేద పండితుడు వెంకట రామమోహన శర్మ స్వామివారి తీర్థప్రసాదాలను అందజేశారు.
*భక్తిశ్రద్ధలతో ప్రత్యేక పూజలు*
స్వామివారి దర్శనం అనంతరం ఆలయ ప్రాంగణంలో ఆధ్యాత్మిక వాతావరణం నెలకొంది. ఆలయ కమిటీ చైర్మన్ అక్కపల్లి రామిరెడ్డి, డైరెక్టర్ బాజా రమేష్ తదితరులు డిప్యూటీ ఇంజనీర్ శ్రీనివాస్ శర్మను శాలువాతో ఘనంగా సన్మానించారు.
*అభివృద్ధి పనులపై క్షేత్రస్థాయి పరిశీలన*
అనంతరం ఆలయ కమిటీ సభ్యులు ఆలయంలో ప్రస్తుతం చేపడుతున్న అభివృద్ధి పనులను డిప్యూటీ ఇంజనీర్ శ్రీనివాస్ శర్మకు క్షేత్రస్థాయిలో వివరించారు. ఆలయ అభివృద్ధి పనులను దాతల సహకారంతో చేపడుతున్నామని కమిటీ సభ్యులు తెలిపారు. భక్తుల సౌకర్యాలను దృష్టిలో ఉంచుకుని ఆలయాన్ని మరింత అభివృద్ధి చేయడానికి కృషి చేస్తున్నట్లు వెల్లడించారు.
*రాజగోపురాల నిర్మాణానికి ప్రతిపాదనలు*
ఆలయ అభివృద్ధిలో భాగంగా ఆలయం చుట్టూ పడమర, ఉత్తరం, తూర్పు వైపుల రాజగోపురాల నిర్మాణానికి ప్రతిపాదనలు సిద్ధం చేసి దేవాదాయ ధర్మాదాయ శాఖకు పంపాలని డిప్యూటీ ఇంజనీర్ శ్రీనివాస్ శర్మ ఆలయ కమిటీకి సూచించారు.
రాజగోపురాల నిర్మాణానికి సంబంధించిన ప్రతిపాదనలను నిబంధనల ప్రకారం సిద్ధం చేసి పంపితే, వాటి నిర్మాణానికి అవసరమైన నిధుల మంజూరుకు కృషి చేస్తానని ఆయన హామీ ఇచ్చారు.
*భక్తులకు మరింత సౌకర్యాలు కల్పించే దిశగా…*
చల్మెడ తిరుమలనాథ స్వామి ఆలయం చారిత్రక, ఆధ్యాత్మిక ప్రాధాన్యత కలిగిన క్షేత్రంగా మరింత అభివృద్ధి చెందేందుకు ఆలయ కమిటీ చేస్తున్న ప్రయత్నాలకు దేవాదాయ శాఖ అధికారుల సహకారం తోడైతే ఆలయ రూపురేఖలు మరింత మారే అవకాశం ఉంది. రాజగోపురాల నిర్మాణం పూర్తయితే ఆలయానికి మరింత వైభవం చేకూరడంతో పాటు, చల్మెడ క్షేత్రానికి వచ్చే భక్తులకు ఆధ్యాత్మికంగా ప్రత్యేక అనుభూతి కలిగే అవకాశం ఉంది.
దాతల సహకారం – కమిటీ కృషి – దేవాదాయ శాఖ మార్గదర్శకత్వం కలిసివస్తే తిరుమలనాథ స్వామి క్షేత్రం భవిష్యత్తులో మరింత అభివృద్ధి చెంది ప్రముఖ ఆధ్యాత్మిక కేంద్రంగా, పర్యాటక కేంద్రంగా రూపుదిద్దుకునే అవకాశం ఉందని భక్తులు ఆశాభావం వ్యక్తం చేస్తున్నారు.
ఈ కార్యక్రమంలో ఆలయ కమిటీ చైర్మన్ అక్క పల్లి రాంరెడ్డి, డైరెక్టర్ బాజా రమేష్, కాకి రాజయ్య చాట్లపల్లి ఎల్లా గౌడ్, దేవాదాయ ధర్మాదాయ శాఖ ఎండోమెంట్ అసిస్టెంట్ ఇంజనీర్ రమేష్ తో పాటు జగన్నాథ ఆచార్యులు, రామేశ్వరరావు ఆలయ సిబ్బంది తదితరులు పాల్గొన్నారు
