హుస్నాబాద్ మున్సిపాలిటీకి పలు అభివృద్ధి పనుల ఆమోదం
- కౌన్సిల్ సాధారణ సమావేశంలో 27 అంశాలకు గ్రీన్ సిగ్నల్
- రూ.15 లక్షలతో పండుగల ప్రత్యేక ఏర్పాట్లు
హుస్నాబాద్ (సిద్దిపేట జిల్లా): హుస్నాబాద్ పురపాలక సంఘ సాధారణ సమావేశం గురువారం కౌన్సిల్ హాలులో మున్సిపల్ చైర్పర్సన్ శ్రీమతి దండి లక్ష్మి అధ్యక్షతన ఘనంగా నిర్వహించారు. ఈ సమావేశంలో పట్టణాభివృద్ధి, సీజనల్ వ్యాధుల నివారణ, పండుగల ఏర్పాట్లు సహా పలు కీలక అంశాలపై చర్చించి నిర్ణయాలు తీసుకున్నారు.
కౌన్సిల్ ముందుకు వచ్చిన మొత్తం 29 అంశాలలో పాలకవర్గం 27 అంశాలకు ఏకగ్రీవ ఆమోదం తెలిపింది.
ప్రధానంగా ఆమోదం పొందిన అంశాలు:
- సీజనల్ వ్యాధుల నివారణ: వర్షాకాలం దృష్ట్యా దోమల వ్యాప్తిని అరికట్టేందుకు కెమికల్స్, గడ్డి మందు, ఆయిల్ బాల్స్ మరియు గంబుసియా (Gambusia) చేపల కొనుగోలుకు రూ. 99,000 అంచనా వ్యయంతో నిధులు కేటాయించారు.
- పండుగల ఏర్పాట్లు: వినాయక చవితి, దేవి నవరాత్రుల నిమజ్జనం కొరకు ఎల్లమ్మ చెరువు వద్ద తగు ఏర్పాట్లకు రూ. 2.00 లక్షలు, అలాగే చిన్న బతుకమ్మ, పెద్ద బతుకమ్మ మరియు దసరా పండుగల ప్రత్యేక ఏర్పాట్ల కోసం రూ. 15.00 లక్షలు కేటాయించారు.
- నీటి సరఫరా & క్రీడా ప్రాంగణం: వర్షాకాలం పట్టణంలో నీటి సరఫరాకు ఆటంకం కలగకుండా మోటార్లు, స్టార్టర్ల మరమ్మతులకు రూ. 5.00 లక్షలు, వైకుంఠధామం (స్టేడియం వద్ద) ప్లంబింగ్ మరియు లైటింగ్ పనులకు రూ. 2.50 లక్షలు ఆమోదించారు.
- అనధికార హోర్డింగులపై జరిమానా: సిద్దిపేట – హనుమకొండ ప్రధాన రహదారిపై మున్సిపాలిటీ ముందస్తు అనుమతి లేకుండా, ఫీజు చెల్లించకుండా ఏర్పాటు చేసిన అనధికార హోర్డింగులకు రూ. 2.00 లక్షల ఫైన్ విధించాలని నిర్ణయించారు.
- రోడ్ల విస్తరణ & గుంతల పూడ్చివేత: రామావరం రోడ్ నుండి కొండ లక్ష్మణ్ బాపూజీ జంక్షన్ వరకు రోడ్డు వెడల్పు సర్వే చేసిన ఏజెన్సీకి రూ. 57,600 చెల్లింపులకు, అలాగే వర్షాల వల్ల ఏర్పడిన గుంతలను మొర్రం, డస్ట్తో పూడ్చడానికి రూ. 3.00 లక్షలు కేటాయించారు.
ఈ సమావేశంలో మున్సిపల్ వైస్ చైర్పర్సన్ పద్మ చిత్తారి, కౌన్సిలర్లు పద్మ, అనుష, లత, రజిత, తిరుపతి, రాజు, సంపత్, సతీష్ కుమార్, మంజుల, వరప్రసాద్, రమేష్, శ్రీనివాస్, వైద్యం కిరణ్ ప్రసాద్, రవీందర్, సుప్రజ, స్వరూప, శోభన్ బాబు, కో-ఆప్షన్ సభ్యులు లావణ్య, సరోజన, హసన్, గ్లోరినా, మున్సిపల్ కమిషనర్ టి. మల్లికార్జున్ మరియు కార్యాలయ అధికారులు పాల్గొన్నారు.
