హుస్నాబాద్ ప్రభుత్వ ఆసుపత్రిలో యాంటీ రేబిస్ టీకాలకు కొరతలేదు
ప్రభుత్వ ఆసుపత్రి సూపరిండెంట్ వి.రమేష్ రెడ్డి
సిద్ధిపేట టైమ్స్ హుస్నాబాద్:
ప్రభుత్వ ఆసుపత్రిలో ARV (కుక్క కాటు తర్వాత ఇచ్చే టీకా) అందుబాటులో లేదన్న వార్తలపై హుస్నాబాద్ కమ్యూనిటీ హెల్త్ సెంటర్ అధికారులు స్పందించారు. తాజా సమాచారం ప్రకారం, హుస్నాబాద్ ప్రభుత్వ ఆసుపత్రిలో టీకాల కొరత లేదని స్పష్టం చేశారు. నవంబర్ 25న పత్రికల్లో వచ్చిన వార్తలను తప్పుగా అర్థం చేసుకున్నారని పేర్కొన్నారు.
ఆసుపత్రి మెడికల్ సూపరిండెంట్ రమేష్ రెడ్డి తెలిపిన వివరాల ప్రకారం, ప్రస్తుతం హుస్నాబాద్ CHCలో 230 వైల్స్ ARV నిల్వలో ఉన్నాయని, ప్రతి నెల సగటున 88 మందికి టీకాలు ఇస్తున్నామన్నారు. ఈ నిల్వలు మరో 8 నుంచి 9 నెలల వరకు సరిపడతాయని చెప్పారు. నెలల వారీగా జనవరిలో 114 మంది, ఫిబ్రవరిలో 100 మంది, మార్చిలో 98 మంది, ఏప్రిల్‌లో 87 మంది, మేలో 83 మంది, జూన్‌లో 55 మంది, జూలైలో 72 మంది, ఆగస్టులో 98 మంది, సెప్టెంబర్‌లో 90 మంది, అక్టోబర్‌లో 100 మంది, నవంబర్‌లో ఇప్పటివరకు 65 మందికి ARV టీకాలు ఇచ్చినట్లు ఆస్పత్రి సూపర్ ఇండెంట్ తెలిపారు.
అదే విధంగా ప్రస్తుతం అందుబాటులో ఉన్న కుక్క కాటు చికిత్సకి వినియోగించే టీకా స్టాక్ వివరాలు అక్టోబర్ 1న 150 వైల్స్ ఉండగా, 60 వైల్స్ అందుకుని 80 వినియోగించారు. నవంబర్ 1న 130 వైల్స్ సిద్ధంగా ఉండగా, 200 వైల్స్ స్వీకరించి 100 వినియోగించడంతో 230 వైల్స్ మిగిలి ఉన్నట్లు తెలిపారు. “ప్రజలు ఎలాంటి భయం లేకుండా ఆసుపత్రికి రావచ్చని కుక్క కాటుకు గురైన వారికి యాంటీ రేబిస్ టీకాలు సమయానికి అందిస్తున్నాం” అని తెలిపారు. అంతేకాకుండా అత్యవసర పరిస్థితుల్లో వినియోగించే ఇంజక్షన్లు, పాము కాటు చికిత్సకు అవసరమైన ఆంటీ స్నేక్ వినం (Anti Snake Venom) కూడా ఆసుపత్రిలో అందుబాటులో ఉందని తెలిపారు. ప్రజలు ప్రభుత్వ ఆసుపత్రి సేవలను వినియోగించుకోవాలని, అత్యవసర చికిత్సలు, టీకాలు సమయానికి అందిస్తున్నాం” అని ఆయన తెలిపారు.
