సంజయన్నా… దేవుడిచ్చిన అన్నవు నువ్వు
మీ సాయం జన్మలో మర్చిపోలేను కేంద్రమంత్రిని కలిసి కృతజ్ఞతలు తెలిపిన తారవ్వ
సిద్దిపేట టైమ్స్ వెబ్ డెస్క్:
ఇటీవల చోటు చేసుకున్న భారీ వర్షాల వల్ల పండించిన సన్న రకం వడ్లు పూర్తిగా కొట్టుకుపోయి తీవ్ర మానసిక ఆవేదనలో ఉన్న స్థానిక రైతు తారవ్వకు కేంద్ర హోంశాఖ సహాయ మంత్రి బండి సంజయ్ ఆదుకున్న విషయం అందరినీ కదిలించింది. సోమవారం హుస్నాబాద్ ప్రభుత్వ ఆసుపత్రిలో ఆధునిక వైద్య పరికరాలను ప్రారంభించేందుకు వచ్చిన బండి సంజయ్‌ను కలిసిన తారవ్వ కన్నీరు మున్నీరయ్యారు.
తారవ్వ నష్టాన్ని తెలిసిన వెంటనే బండి సంజయ్ ఢిల్లీ నుండి స్వయంగా ఫోన్ చేసి, “బాధపడొద్దు, మీకు నేను సహాయం చేస్తా” అంటూ ధైర్యం చెప్పారు. వెంటనే తక్షణ సహాయంగా రూ.50 వేల రూపాయలు పంపనున్నట్లు ప్రకటించారు. ఆ మరుసటి రోజే బీజేపీ స్థానిక నేతల ద్వారా ఆ మొత్తాన్ని తారవ్వకు అందజేయడంతో రైతు కుటుంబానికి ఊరట లభించింది.
ఈ సందర్భంగా బండి సంజయ్‌ను ప్రత్యక్షంగా కలిసిన తారవ్వ భావోద్వేగానికి లోనై మాట్లాడుతూ,
“సంజయన్నా… దేవుడిచ్చిన అన్నవు నువ్వు. మీరు చేసిన సాయం నేను జన్మలో మర్చిపోలేను. పంట నష్టపోయి పుట్టెడు దు:ఖంలో ఉండగా ఫోన్ చేసి ధైర్యం చెప్పినవ్, సాయం చేసినవ్. నువ్వు నిండా నూరేళ్లు సల్లగా ఉండాలి” అంటూ కృతజ్ఞతలు తెలిపింది.
బండి సంజయ్ ఈ సందర్భంగా మాట్లాడుతూ, రైతులు కష్టాల్లో ఉన్నప్పుడు వారి పక్షాన నిలబడటం ప్రతి ప్రజాప్రతినిధి బాధ్యత అని పేర్కొన్నారు. తారవ్వలాంటి బాధితులకు కేంద్ర ప్రభుత్వం ఎల్లప్పుడూ అండగా ఉంటుందని స్పష్టం చేశారు. స్థానిక ప్రజలు, రైతులు బండి సంజయ్ అభినందిస్తూ “మనసున్న నాయకుడు”గా కొనియాడుతున్నారు.
