బీజేపీ సర్పంచ్ అభ్యర్థులను ఏకగ్రీవంగా ఎన్నుకుంటే రూ.10 లక్షలు
సిద్దిపేట జిల్లా బీజేపీ మాజీ అధ్యక్షుడు గంగిడి మోహన్ రెడ్డి
సిద్దిపేట టైమ్స్ హుస్నాబాద్:
సిద్దిపేట జిల్లా హుస్నాబాద్ పట్టణంలో శుక్రవారం మండల బీజేపీ గ్రామీణ అధ్యక్షుడు భూక్యా సంపత్ నాయక్ ఆధ్వర్యంలో ఎన్నికల సన్నాహక సమావేశం నిర్వహించారు. ఈ సమావేశానికి సిద్దిపేట జిల్లా బీజేపీ మాజీ అధ్యక్షుడు గంగిడి మోహన్ రెడ్డి, రాష్ట్ర కార్యవర్గ సభ్యుడు కోమటిరెడ్డి రామగోపాల్ రెడ్డి, హుస్నాబాద్ ఎన్నికల ఇన్చార్జి లక్కీరెడ్డి తిరుమల ముఖ్య అతిథులుగా హాజరయ్యారు. ఈ సందర్భంగా మోహన్ రెడ్డి మాట్లాడుతూ… గత రెండు సంవత్సరాలుగా గ్రామ పంచాయతీ ఎన్నికలు నిర్వహించకుండా రాష్ట్ర ప్రభుత్వం నిర్లక్ష్యంగా వ్యవహరించిందని, కేవలం కేంద్ర ప్రభుత్వం నుండి రూ.3 వేల కోట్ల నిధులు వచ్చే సమయం అయిపోతుందనే ఉద్దేశముతో ఆ నిధులను రాబట్టడానికి మాత్రమే గ్రామపంచాయతీ ఎన్నికలు ఆగమేఘాల మీద నిర్వహిస్తున్నారని ఆరోపించారు. గత 2 సంవత్సరాలుగా తెలంగాణలో గ్రామ పంచాయతి ఎన్నికలు నిర్వహించక పోవడంతో గ్రామాలలో అభివృద్ధి, పారిశుధ్యం కుంటుపడిందని, అధికారంలోకి వచ్చిన నాటి నుండి రాష్ట్ర ప్రభుత్వం గ్రామాలను పట్టించుకున్న పాపాన పోలేదని అన్నారు. హుస్నాబాద్ నియోజకవర్గంలో కేంద్ర మంత్రి బండి సంజయ్ చొరవతోనే కేంద్ర ప్రభుత్వం నుండి సిద్దిపేట హుస్నాబాద్ హైవే కు మరియు గ్రామీణ ప్రాంతాలలో డబల్ రోడ్లకు నిధులు మంజూరయ్యాయని తెలిపారు. బీజేపీ కేంద్రంలో ఏర్పాటయిన నాటి నుండి ఉచితంగా పేదలకు బియ్యం అందిస్తుందని, అందులో కేజీకి రూ.35 లకు గాను రూ.33 కేంద్ర ప్రభుత్వం ఇస్తుందని కేవలం రూ. 2 మాత్రమే రాష్ట్ర ప్రభుత్వం చెల్లిస్తుందని తెలియజేశారు. అదేవిధంగా ప్రతి గ్రామంలో వైకుంఠ ధామాలు నిర్మించిందని తెలిపారు. రాబోయే ఎన్నికల్లో నియోజకవర్గంలోని ప్రతి గ్రామంలో, ప్రతి తండాలో, ప్రతి గ్రామ పంచాయతీలో బీజేపీ పార్టీ అభ్యర్థులు బరిలో నిలుస్తారని ఏకగ్రీవంగా బీజేపీ అభ్యర్థులను ఎన్నుకున్నట్లయితే అట్టి గ్రామానికి కేంద్ర ప్రభుత్వం తో రూ.10 లక్షల నిధులు మంజూరు చేయిస్తానని కేంద్ర మంత్రి హామీ ఇచ్చారని తెలిపారు. గ్రామాలలో బీజేపీ సర్పంచ్ అభ్యర్థులను గెలిపించి అభివృద్ధికి పాటుపడాలని కోరారు. ఈ సమావేశంలో బీజేపీ నాయకులు వెల్దండి రాజేంద్రప్రసాద్, బొమ్మగాని సతీష్, కుంట మల్లయ్య, పూదరి కిష్టయ్య, బైరి అరుణ్, శ్రీనివాస్, వెల్ది శ్రీనివాస్, ఇటికాల కుమారస్వామి, కొలిపాక కిరణ్, పిట్టల సంతోష్, ప్రశాంత్ తదితరులు పాల్గొన్నారు.
