చందర్రావుకు ఎమ్మెల్యే మాధవరెడ్డి మద్దతు…గురిజాలలో కాంగ్రెస్ జోరు
సిద్దిపేట టైమ్స్ వరంగల్:
వరంగల్ జిల్లా గురిజాల గ్రామంలో రాజకీయ వాతావరణం వేడెక్కింది. గ్రామ అభివృద్ధి, స్థానిక సమస్యల పరిష్కారమే లక్ష్యంగా ఎమ్మెల్యే దొంతి మాధవరెడ్డి స్వయంగా రంగంలోకి దిగడంతో గ్రామంలో కీలక పరిణామం చోటుచేసుకుంది. ఆయన గ్రామానికి చేరుకుని గ్రామస్థులతో ప్రత్యక్షంగా సమావేశమై వారి సమస్యలను తెలుసుకున్నారు. త్రాగునీరు, రహదారులు, పారిశుధ్యం, ఉపాధి వంటి అంశాలపై ప్రజలు వినిపించిన సమస్యలకు తక్షణమే చర్యలు చేపడతామని ఎమ్మెల్యే హామీ ఇచ్చారు. ప్రజల సహకారంతో గురిజాల గ్రామాన్ని అన్ని రంగాల్లో అభివృద్ధి పథంలో నడిపిస్తామని ఆయన స్పష్టం చేశారు.
ఈ సందర్భంగా గురిజాల గ్రామ కాంగ్రెస్ పార్టీ అభ్యర్థి చందర్రావు రాజకీయ ప్రస్థానాన్ని ఎమ్మెల్యే ప్రత్యేకంగా ప్రస్తావించారు. గతంలో అధికారంలో లేకపోయినా, గత సర్పంచ్ ఎన్నికల్లో స్వల్ప తేడాతో ఓటమి పాలైనా పార్టీ కోసం వెనుకడుగు వేయకుండా నిరంతరం ప్రజల మధ్య ఉంటూ పోరాటం సాగించారని కొనియాడారు. ఆయన కష్టం, అంకితభావాన్ని గుర్తించిన గ్రామ ప్రజలు ఈసారి భారీ మెజారిటీతో చందర్రావును గెలిపించాలని ఎమ్మెల్యే దొంతి మాధవరెడ్డి పిలుపునిచ్చారు.
ఈ సందర్భంగా నిర్వహించిన సభకు గురిజాల గ్రామంతో పాటు పరిసర ప్రాంతాల నుంచి కూడా పెద్ద సంఖ్యలో ప్రజలు తరలివచ్చారు. సభలో కనిపించిన ప్రజా మద్దతు, ఉత్సాహాన్ని బట్టి చూస్తే ఈ ఎన్నికల్లో చందర్రావు విజయం దాదాపు ఖరారైనట్టేనని రాజకీయ వర్గాలు విశ్లేషిస్తున్నాయి.
