సీఎం పర్యటన ఏర్పాట్లపై ముఖ్య కార్యకర్తలతో మంత్రి పొన్నం సమీక్ష
సిద్దిపేట టైమ్స్ హుస్నాబాద్ :
సిద్దిపేట జిల్లా హుస్నాబాద్‌లో డిసెంబర్ 3న జరుగనున్న ముఖ్యమంత్రి రేవంత్ రెడ్డి పర్యటనకు సంబంధించి హుస్నాబాద్ ఎమ్మెల్యే క్యాంప్ కార్యాలయంలో టౌన్, రూరల్ కాంగ్రెస్ కీలక నేతలతో మంత్రి పొన్నం ప్రభాకర్ సమీక్ష సమావేశం నిర్వహించారు. ఈ సందర్భంగా మంత్రి మాట్లాడుతూ… ముఖ్యమంత్రి హోదాలో మొదటిసారి హుస్నాబాద్‌కు వస్తున్నందున భారీ స్థాయిలో ఏర్పాట్లు చేయాలని సూచించారు. పలు అభివృద్ధి కార్యక్రమాలకు సీఎం శంకుస్థాపన చేసిన అనంతరం పట్టణంలో బహిరంగ సభలో పాల్గొంటారని తెలిపారు. గతంలో పీసీసీ అధ్యక్షుడిగా హుస్నాబాద్ లో పర్యటించి, ప్రియాంకా గాంధీ సభలో పాల్గొన్న రేవంత్ రెడ్డి ఇప్పుడు ముఖ్యమంత్రిగా రావడం హుస్నాబాద్‌కు మైలురాయిగా పేర్కొన్నారు.
సభకు సంబంధించి స్టేజ్ ఏర్పాటు, భద్రత, తాగునీరు, రవాణా, మౌలిక సదుపాయాల విషయాలను అధికారులు సమగ్రంగా పర్యవేక్షించాలని ఆదేశించారు. ముఖ్య నేతలు ఇంటింటికీ వెళ్లి ఆహ్వాన పత్రికలు పంపిణీ చేయాలని సూచించారు. సర్పంచ్ ఎన్నికల్లో రూరల్ కాంగ్రెస్ నాయకులు అన్ని గ్రామాల్లో క్లీన్ స్వీప్ సాధించాలని దిశానిర్దేశం చేశారు. హుస్నాబాద్ నియోజకవర్గంలో రోడ్లు, డ్రైనేజీ, గ్రామ పంచాయతీ, అంగన్వాడీ భవనాల నిర్మాణాలు వేగంగా జరుగుతున్నాయని మంత్రి తెలిపారు. గౌరవెల్లి ప్రాజెక్ట్‌కు సంబంధించిన అడ్డంకులు తొలగుతూ వస్తున్నాయని, త్వరలోనే కాలువలు పూర్తి చేసి నియోజకవర్గాన్ని సస్యశ్యామలం చేస్తామన్నారు. ప్రతి గ్రామానికి అందిన స్టీల్ బ్యాంక్ వసతిని సద్వినియోగం చేసుకోవాలని సూచించారు.
సమగ్ర సమన్వయంతో సీఎం పర్యటనను విజయవంతం చేయాలి. ప్రజలకు ప్రభుత్వ పథకాల గురించి విస్తృతంగా వివరించే అవకాశంగా ఈ సభను వినియోగించుకోవాలని నేతలకు స్పష్టం చేశారు.
