హుస్నాబాద్ లో సీఎం పర్యటన ఏర్పాట్లను పరిశీలించిన మంత్రి పొన్నం
సిద్దిపేట టైమ్స్ హుస్నాబాద్ :
ముఖ్యమంత్రి రేవంత్ రెడ్డి డిసెంబర్ 3న హుస్నాబాద్‌లో పర్యటించనున్న నేపథ్యంలో పర్యటనకు సంబంధించిన ఏర్పాట్లను రాష్ట్ర మంత్రి పొన్నం ప్రభాకర్ శనివారం పరిశీలించారు. అక్కన్నపేట రోడ్డు లో ఏర్పాటు చేస్తున్న బహిరంగ సభ స్థలాన్ని స్థానిక నాయకులు, అధికారులతో కలిసి సందర్శించిన మంత్రి – ప్రజలు భారీ సంఖ్యలో తరలిరావొచ్చన్న నేపథ్యంలో సమగ్ర ఏర్పాట్లు చేయాలని ఆదేశించారు. సభ ప్రాంగణంలో భద్రతా చర్యలను పటిష్టంగా అమలు చేయాలని సూచించిన ఆయన, పార్కింగ్ సౌకర్యాలు, సమీప రహదారుల విస్తరణ, తాగునీరు, మరుగుదొడ్లు వంటి మౌలిక వసతులను సమర్ధంగా కల్పించాలని అధికారులకు ఆదేశించారు. ఏర్పాట్ల పనులను వేగవంతం చేయాలని చెప్పారు.
ఈ సందర్భంగా మంత్రి మాట్లాడుతూ – ప్రజాపాలన ప్రభుత్వానికి రెండేళ్లు పూర్తయిన నేపథ్యంలో ముఖ్యమంత్రి ప్రజల మధ్యకు వస్తున్నారని తెలిపారు. ఇప్పటి వరకు చేపట్టిన అభివృద్ధి కార్యక్రమాలు, భవిష్యత్తు కార్యాచరణపై సీఎం సభలో వివరించనున్నారని చెప్పారు. నాలుగు జిల్లాల కేంద్రంగా ఉన్న హుస్నాబాద్ నియోజకవర్గంలో విద్య, వైద్యం, పారిశ్రామికీకరణ, ఉపాధి, ఇరిగేషన్ వంటి రంగాల్లో అభివృద్ధికి ప్రభుత్వం కట్టుబడి ఉందన్నారు. ఈ పర్యటనతో ప్రజల ఆకాంక్షలు నెరవేరుతాయని ఆశాభావం వ్యక్తం చేశారు. సభకు ముఖ్యమంత్రితో పాటు పలువురు కేబినెట్ మంత్రులు హాజరుకానున్నారని వెల్లడించిన పొన్నం ప్రభాకర్, నియోజకవర్గ ప్రజలంతా సభకు తరలిరావాలని విజ్ఞప్తి చేశారు. ఈ కార్యక్రమంలో గ్రంధాలయ చైర్మన్ కేడం లింగమూర్తి, సింగిల్ విండో చైర్మన్ బొలిశెట్టి శివయ్య, కాంగ్రెస్ నాయకులు బొమ్మ శ్రీరామ్ చక్రవర్తి, చిత్తారి రవీందర్, వల్లపు రాజు తదితర నాయకులు పాల్గొన్నారు.
