హుస్నాబాద్ ప్రభుత్వ ఆసుపత్రికి మహార్దశ
రూ.కోటి విలువైన మెడికల్ ఎక్విప్ మెంట్ ను అందించిన కేంద్ర మంత్రి బండి సంజయ్
సిద్ధిపేట టైమ్స్ వెబ్ డెస్క్:
సిద్దిపేట జిల్లా హుస్నాబాద్ ప్రభుత్వ ఆసుపత్రికి కేంద్ర హోంశాఖ సహాయ మంత్రి బండి సంజయ్ రూ. కోటి ఎక్విప్ మెంట్ ను అందించారు. సోమవారం ప్రభుత్వ ఆసుపత్రికి సందర్శించి మాట్లాడారు. ప్రభుత్వ ఆసుపత్రుల్లో కుక్క కాటుకు కూడా మందు అందుబాటులో లేని దుస్థితి నెలకొందని కేంద్ర హోంశాఖ సహాయ మంత్రి బండి సంజయ్ కుమార్ ఆవేదన వ్యక్తం చేశారు. ‘‘సర్కార్ ఆసుపత్రులకు వచ్చే వాళ్లంతా పేద, మధ్య తరగతి ప్రజలే. ప్రైవేట్ ఆసుపత్రుల్లో ట్రీట్ మెంట్ చేసుకోలేని వాళ్లే. సూది మందుతోపాటు కనీస సౌకర్యాల్లేక పోతే పేదల పరిస్థితి ఏంది? చావాల్సిందేనా?’’ అని ప్రశ్నించారు. ఇకపై ఇక్కడికి వచ్చే రోగులెవరూ ట్రీట్ మెంట్ కోసం బయటకు వెళ్లే దుస్థితి రానీయొద్దని, అందుకోసం తన పార్లమెంట్ నియోజకవర్గ పరిధిలోని ప్రభుత్వ ఆసుపత్రులకు అవసరమైన పరికరాలను, సాయాన్ని అందించేందుకు ముందుకొచ్చినట్లు తెలిపారు. ‘‘ఇకపై ఒక్క పేషెంట్ కూడా ట్రీట్ మెంట్ కోసం బయటకు వెళ్లే పరిస్థితి రానీయొద్దు. ఈ ఆసుపత్రికి ఇంకా ఏమేం కావాలో చెప్పండి. అన్ని సౌకర్యాలను సమకూరుస్తా. ఈ ఆసుపత్రికి వచ్చే వాళ్లంతా పేదలు, మధ్య తరగతి వాళ్లే. ఆర్ధికంగా లేనివాళ్లే. అట్లాంటి వాళ్లను టెస్టుల్లేవనో, సూది మందు లేదనో ప్రైవేట్ ఆసుపత్రికి పంపి వారిపై భారం మోపొద్దు. పేదలకు సేవ చేయడం మహా భాగ్యం. మానవ సేవే మాధవ సేవ అని గుర్తుంచుకుని సేవలందించండి.’’అని కోరారు.
ఎన్ ఎండీసీ సంస్థ సహకారంతో సీఎస్సార్ నిధులతో సుమారు రూ.కోటి విలువైన అత్యాధునిక వైద్య పరికరాలను హుస్నాబాద్ ఆసుపత్రికి అందజేశారు. ఇందులో ఈసీజీ మిషన్లు, అల్ట్రాసౌండ్ మిషన్, ఈఎన్టీ సర్జికల్ మైక్రోస్కోప్, మల్టిపుల్ మానిటర్చ మార్చురీ కేబినెట్ సహా మొత్తం 15 రకాల వైద్య పరికరాలను (మెడికల్ ఎక్విప్ మెంట్స్) ఉన్నాయి. ఆయా పరికరాల ద్వారా అందించే సేవలను డాక్టర్లను అడిగి తెలుసుకున్నారు. ఆసుపత్రి సిబ్బందితో కలిసి ఫోటోలు దిగారు. అనంతరం రోగులను కలిసి ఆసుపత్రిలో అందుతున్న వైద్య సేవలపై ఆరా తీశారు. డాక్టర్లతో సమావేశమై ఆసుపత్రిలో నెలకొన్న సమస్యలను అడిగి తెలుసుకున్నారు.
అనంతరం మీడియాతో మాట్లాడుతూ….విద్య, వైద్య రంగాలకు సంబంధించి పేదలకు పూర్తిస్తాయిలో సేవలు అందించాల్సిన బాధ్యత ప్రభుత్వాలపై ఉంది. కానీ దురద్రుష్టవశాత్తు ప్రభుత్వ ఆసుపత్రుల పరిస్థితి అంతంత మాత్రంగానే ఉంది. ఇక్కడికి వచ్చే రోగులకు సూదుల్లేవు, మందుల్లేవు, టెస్టులు చేయడానికి పరికరాల్లేవు. కుక్క కాటుకు మందు కూడా లేదని వార్తలొస్తున్నాయి. అట్లయితే పేదల పరిస్థితి ఏంది? చనిపోవాల్సిందేనా?’’అని ప్రశ్నించారు. ప్రభుత్వ ఆసుపత్రికి వచ్చే వాళ్లంతా పేదలు, మధ్య తరగతి ప్రజలే. లక్షలు ఖర్చు పెట్టి వైద్యం చేయించుకోలేరనే సంగతిని గుర్తుంచుకోవాలి. వాళ్లకు సరైన వైద్యం అందించాల్సిన బాధ్యత ఇక్కడి డాక్టర్లు, సిబ్బందిపై ఉంది. కేంద్ర నిధులతోనే దాదాపు సర్కార్ ఆసుపత్రులన్నీ నడుస్తున్నాయి. నేషనల్ హెల్త్ మిషన్ ద్వారా పెద్ద ఎత్తున వస్తున్న నిధులు వస్తున్నాయి. అయితే రాష్ట్ర ప్రభుత్వం ఆశించిన స్థాయిలో నిధులు ఇవ్వకపోవడంవల్ల ప్రభుత్వ ఆసుపత్రుల్లో మందులకు, సూది, కాటన్, ఇతర చిన్న చిన్న మెడికల్ పరికరాల కొనుగోలు చేయలేక ఇబ్బందులు వస్తున్నాయి. వీటిని ద్రుష్టిలో పెట్టుకునే నా పార్లమెంట్ నియోజకవర్గంలోని ప్రభుత్వ ఆసుపత్రుల్లో ఏ ఇబ్బందుల్లేకుండా ఎన్ ఎం డి సి సంస్థ సహకారంతో సీఎస్సార్ ఫండ్స్ తో ఈ మెడికల్ ఎక్విప్ మెంట్స్ ను కొనుగోలు చేసి ప్రభుత్వ ఆసుపత్రులకు అందించడం జరిగిందన్నారు.గతంలో సుమారు 3 కోట్ల రూపాయలకుపైగా నిధులను ఖర్చు చేసి ఎక్స్ రే మిషన్, సీటీ స్కాన్, అంబులెన్సులను కరీంనగర్ జిల్లా ప్రధాన ఆసుపత్రికి అందజేసిన. వేములవాడతోపాటు హుజూరాబాద్, హుస్నాబాద్, జమ్మికుంట సహా ప్రభుత్వ ఆసుపత్రుల్లో సుమారు రూ. 4 కోట్ల రూపాయలకుపైగా సీఎస్సార్ నిధులను తీసుకొచ్చి మెడికల్ ఎక్విప్ మెంట్స్ ను అందిస్తున్నా. వీటిని సద్వినియోగం చేసుకోవాలి. ఇకపై ఏ ఒక్క రోగి కూడా ప్రభుత్వ ఆసుపత్రికి వస్తే చికిత్స తీసుకోకుండా వెళ్లడానికి వీల్లేకుండా చర్యలు తీసుకోవాలి. మానవ సేవే మాధవ సేవ. ప్రజలు డాక్టర్లను మాత్రమే ప్రత్యక్ష దైవంగా భావిస్తాం. అంతటి గొప్ప వ్రుత్తిని దైవంగా భావించి పేదలకు సేవలందించాలని కోరారు.
కేంద్రమంత్రికి పత్తి రైతుల వినతి
పత్తి కొనుగోలు పరిమాణాన్ని ఏడు నుండి తొమ్మిది క్వింటాళ్లకు పెంచి కార్పొరేషన్ ఆఫ్ ఇండియా కొనుగోలు చేసేలా చర్యలు తీసుకోవాలని హుస్నాబాద్ నియోజకవర్గ పత్తి రైతులు కేంద్ర హోంశాఖ సహాయం మంత్రి బండి సంజయ్ కుమార్ ని కోరుతూ వినతి పత్రం అందించారు. దీనిపై సానుకూలంగా స్పందించిన మంత్రి ఈ విషయంపై సీసీఐ అధికారులు సంబంధిత శాఖ మంత్రి దృష్టికి తీసుకు వెళ్తానని హామీ ఇచ్చారు.
