కర్ర శ్రీహరి మరణం హుస్నాబాద్ ప్రాంత ప్రజలకు తీరని లోటు
కర్ర శ్రీహరి ఆశయాలను కొనసాగిస్తాం…. ఆత్మీయులు అభిమానులు
సిద్దిపేట టైమ్స్ హుస్నాబాద్:
హుస్నాబాద్ పట్టణంలోని అంబేద్కర్ చౌరస్తా లో ఈరోజు కీ.శే. కర్ర శ్రీహరి సంతాప సభ మరియు అన్నదాన కార్యక్రమం ఘనంగా నిర్వహించబడింది. ఈ కార్యక్రమాన్ని ఆయన ఆత్మీయులు, అభిమానులు ఆధ్వర్యంలో చేపట్టారు. కర్ర శ్రీహరి దాదాపు నలభై ఏళ్లకు పైగా రాజకీయాలలో పనిచేసి, ప్రజలకు సేవలందించారు. కోహెడ మండలంలో ఎం.పి.పి., జడ్పిటిసి పదవులు చేపట్టిన ఆయన, అనంతరం ఇంద్రవెల్లి నియోజకవర్గం నుండి ఎమ్మెల్యేగా పోటీ చేసి, ఓటమి అనంతరం కూడా ప్రజాసేవను ఆపలేదు. ఆయన సేవలు హుస్నాబాద్ ప్రాంత ప్రజలకు మరపురాని వాటిగా నిలిచాయి.
తెలంగాణ ఉద్యమంలో కీలక పాత్ర పోషించిన నాయకుడిగా ఆయనకు ప్రత్యేక గుర్తింపు లభించింది. హుస్నాబాద్ ప్రాంత అభివృద్ధి కోసం చేసిన కృషి, ప్రజల పట్ల చూపిన ఆప్యాయత ఆయనను ప్రజా హృదయాల్లో నిలిపింది. సంతాప సభలో పలువురు నాయకులు మాట్లాడుతూ,
“కర్ర శ్రీహరి నిజాయితీ, నిబద్ధత గల ప్రజా నాయకుడు. పదవులు లేకపోయినా ప్రజలతో మమేకమై సేవలందించారు. ఆయన మరణం హుస్నాబాద్ ప్రజలకు తీరని లోటు” అని పేర్కొన్నారు. అలాగే ఆయన ఆశయాలను కొనసాగిస్తూ ప్రాంత అభివృద్ధికి కృషి చేస్తామని తెలిపారు. ఈ సంతాప సభలో చివరగా నాయకులు, ప్రజలు కర్ర శ్రీహరి సేవలను స్మరించుకొని, ఆయన ఆత్మకు శాంతి కలగాలని ప్రార్థించారు.
ఈ కార్యక్రమంలో జిల్లా గ్రంథాలయ చైర్మన్ కేడం లింగమూర్తి, మాజీ మున్సిపల్ చైర్మన్ సుద్దాల చంద్రయ్య, అయిలేని మల్లికార్జున రెడ్డి, ఆకుల వెంకట్, అక్కు శ్రీనివాస్, బద్ది పడిగే రాజీ రెడ్డి, పందిళ్ళ శంకర్, ఎగ్గిడి ఐలయ్య, కన్నోజు రామకృష్ణ, ఆడెపు లక్ష్మీనారాయణ, మెదిని వెంకట స్వామి, కురువెల్లి శ్రీనివాస్, పచ్చిమట్ల రవీందర్ గౌడ్, బుర్ర వెంకన్న, మల్కి రెడ్డి మొహరెడ్డి, మేకల వికాస్ యాదవ్, బొజ్జ హరీష్, వీర్ నారాయణ, శ్యామ్ గౌడ్, వెంకటేష్, బత్తుల రవీందర్, బత్తుల జీవన్ తదితరులు పాల్గొన్నారు.
