పోలింగ్ కేంద్రాల వద్ద పోలీసుల అత్యుత్సాహం

పోలింగ్ కేంద్రాల వద్ద పోలీసుల అత్యుత్సాహం

నల్లబెల్లి మండలంలో ఓటర్లకు అసౌకర్యం

సిద్దిపేట టైమ్స్ ఉమ్మడి వరంగల్ జిల్లా, నల్లబెల్లి:

పోలింగ్ కేంద్రాల వద్ద కొందరు పోలీసుల తీరు ప్రజాస్వామ్య స్ఫూర్తికి విరుద్ధంగా ఉందన్న విమర్శలు వెల్లువెత్తుతున్నాయి. నల్లబెల్లి మండలం నారక్కపేటలో ఓటు హక్కును వినియోగించుకునేందుకు వచ్చిన ఓటర్లపై అనవసరంగా దురుసుగా ప్రవర్తిస్తూ, ఓటు వేసిన వెంటనే అక్కడి నుంచి వెళ్లిపోవాలంటూ బెదిరింపు ధోరణిలో మాట్లాడుతున్నారని స్థానికులు ఆవేదన వ్యక్తం చేస్తున్నారు. విధుల నిర్వహణ పేరుతో అతిశయోక్తి ఉత్సాహం ప్రదర్శిస్తూ, ప్రశాంత వాతావరణంలో జరగాల్సిన పోలింగ్ ప్రక్రియను భయభ్రాంతులకు గురిచేసేలా మారుస్తున్నారని ఆరోపిస్తున్నారు. ఈ కారణంగా పలువురు ఓటర్లు పోలింగ్ కేంద్రాల వద్ద అసౌకర్యానికి లోనవుతున్నారని, స్వేచ్ఛాయుతంగా ఓటు హక్కును వినియోగించుకునే వాతావరణం దెబ్బతింటోందని అంటున్నారు. ప్రజాస్వామ్యంలో ఓటు హక్కు పవిత్రమైనదని, దానిపై ఎలాంటి ఒత్తిడి లేదా భయపెట్టే చర్యలు తగవని పలువురు అభిప్రాయపడుతున్నారు. పోలీసుల విధులు శాంతి భద్రతలు కాపాడటమేనని, ఓటర్లను అణచివేసేలా ప్రవర్తించడం తగదని పేర్కొంటున్నారు. ఈ అంశంపై ఎన్నికల సంఘం వెంటనే స్పందించి విచారణ చేపట్టి, బాధ్యులైన అధికారులపై కఠిన చర్యలు తీసుకోవాలని స్థానిక ప్రజాసంఘాలు డిమాండ్ చేస్తున్నాయి. స్వేచ్ఛాయుత, న్యాయమైన ఎన్నికలు నిర్వహించాల్సిన బాధ్యత అందరిదేనని వారు గుర్తు చేస్తున్నారు.